Шагның аазы - Шагаа келди!
Шагаа-биле, курай, курай!
Чаа шагның эргилдезин,
Чаңчыл сагып, уткуп аар бис.
Өгбелерден ужукталган,
Өндүр чаңчыл чиде бербээн
Өглер санай аъштыг-чемниг,
Өөрүшкүлүг ойнап, хөглээн!
Ужурларның ужук дөзү -
Үндезинниң үүжези,
Улус-чонум ыдыктаары,
Үе-шагның эргилдези.
Арттар санай ыткан йөрээл,
Аал-чуртум эргиир болзун!
Аралашкан төрел чонум
Аразында демниг чорзун!
Чолукшааннар чогушпазын,
Чорук-херээ аайлашсын!
Кыры шимчээр, хырын тодар
Кылган-туткан үүле бүтсүн!
Малчыннарның йөрээлдери
Малын эргий өршээп чорзун!
Аймак-төрел аайы-биле,
Ак чем өргүп, уткуп алзын!
Шагаавысты хүндүткелдиг,
Шайны чажып, курайлаар бис.
Дүжүп келир Тоолай чылы
Дүжүт долу, моорлап, өршээ!
Эрес эрлер куу даң баштап,
Эртинелиг чуртун алгап,
Эки шагның хаяазында
Элбек Саңын кыпсып, салзын!
Эрлер эр бооп, бүдүш салбайн
Эрес сузу хадывазын!
Кыстар кыс бооп, топтуг чаңныг,
Кызымаккай кежээ чорзун!
Көшкүн чоннуң сүлде-сүзүү
Өгбе шагдан ыдык Шагаа!
Амыр-тайбың чуртталганы
Авыралап, сөңнеп, өршээ!
Шагаа, Шагаа – Амыргын-на!
Шагаа, Шагаа – Сол менди-ле бе?!
Шагаа, Шагаа – Ыът-куш сол бе?!
Шагаа, Шагаа – Моорлап, өршээ!
Курай! Курай! Курай!